生活

《ERROR 自肥企画》當下最有社會責任嘅電視節目 /林兆彬

查小欣同屈穎妍鬧爆《ERROR 自肥企画》意識不良、冇社會責任,唔該佢哋睇哂十五集節目先至好評論。不過都係算啦,佢哋肯肯定睇唔明個大結局,亦唔會明白點解節目會引起香港人咁大迴響。

我睇咗 29 年電視,都未曾睇過香港有《ERROR 自肥企画》呢啲咁有深度嘅綜藝節目,大結局勁啊,同第一集玩首尾呼應,再次惡搞 1995 年嘅日本動畫《新世紀福音戰士》嘅經典結局,令人拍哂手掌。當年動畫據聞因為經費不足同埋製作進度落後嘅關係,所以喺中段開始改變風格,最尾兩集更大暴走,使用大量意識流畫面、靜止鏡頭、心理獨白,探討大量心理學同哲學問題,睇到觀眾頭都大埋,廿幾年嚟被喻為「神作」。而《ERROR 自肥企画》唔單止令大家每晚 11 點鐘乖乖哋睇電視,仲顛覆咗觀眾對電視節目嘅想像,將佢形容為「神作」都絕不誇張。

最初我哋可能會以為《ERROR 自肥企画》只係好似以前 ERROR 嘅綜藝咁繼續 sell 玩得好痴線好搞笑,但望返轉頭,其實《ERROR 自肥企画》第一集開頭惡搞《新世紀福音戰士》已透露咗節目嘅深層意義。旁白話:「唔移民嘅話,香港呢個爛攤子就點都係你㗎啦!面前嘅困境,你有冇能力打敗佢呀?」節目表面上係一個綜藝遊戲真人騷,但內裡其實係一個「心靈輔導療程」。治療邊個?唔係 ERROR 四子,而係治療無力感超重、對未來感到絕望嘅香港人。「如果唔移民嘅話,究竟點樣繼續喺香港生活?」呢個問題一直困擾著唔少人。

《ERROR 自肥企画》呢十五集都設計得好好,唔知係經過精心計算定係運氣驅使,一步一步咁帶領觀眾「入坑」。頭五集嘅內容係主打搞笑痴線,玩唔同嘅自虐遊戲,例如有「死亡行星」不斷帶畀觀眾歡樂,吸引觀眾追落去。而「個人自肥企画」環節有少少似 2020 年《ERROR 自救 TV》,講 ERROR 四子努力嘗試然後成長,今次以 193 同保錡最為明顯,分別成功製作第一首 solo MV,又學識唔同技能,用汗水去感動觀眾,鼓勵觀眾追夢、唔好放棄。第五集嘅「暴走族」MV 同樣都係好熱血,感動到觀眾。

去到第六集至第十集,其實講緊今日嘅香港已經變咗,已經唔再係以前嘅香港,節目內有唔少符號,睇得明嘅就自然明。例如,「侏羅紀公主」嘅「速龍」同「上返行人路」、「錯誤體育祭」嘅遊戲規則;「香港 ERROR 遊」嘅「Hello! Hello!」喚起童年回憶,又加入反資本主義對白、播《國際歌》、黃店、不斷重覆「Free」和「Freedom」字眼、最後有「I Want You HK(黃心心)」畫面;第十集出海搵中華白海豚,暗批港珠澳大橋破壞海洋生態。

第十一集開始,節目主題明顯圍繞「堅持」。「BTS(Behind The Scene)」嗰集講工作花絮,製作團隊點樣喺冇乜 budget 嘅情況下仍然堅持製作節目,「致一直還在堅持的人」畫面引起好大迴響,除咗係欣賞幕前幕後堅持追夢之外,當然有政治上嘅投射,黃絲們對號入座,得到一種被鼓勵的感覺。之後幾集又講 ERROR 四子在演藝路上嘅堅持,令觀眾感受到努力嘅成果。喺今時今日嘅香港,講人話唔係容易嘅事,連油尖旺區議會想整「香港加油」燈飾,都被民政署以「為免引起誤會及影響社會和諧」理由封殺,所以電視節目叫人「堅持」都幾大膽。

第十五集「電視?為什麼?」,惡搞《新世紀福音戰士》經典結局,突然將節目推向超高嘅高度,簡直係電視史上最大嘅自我反思。內容充滿哲學,先討論「點解公司要拍節目?阿 Dee 點解要拍節目?ERROR 組合是什麼?」然後再反思「娛樂」同「電視娛樂」嘅本質,某一刻更好像推翻過去十四集嘅意義,最後再得出答案:電視係對抗零碎娛樂嘅武器,承載重大意念。喺呢八分鐘短劇入面,有大量對白都令香港人很有共鳴,例如:

「最痛嘅時候,都可以不按牌理咁歡笑,係 ERROR 發放嘅意義,係呢時代大家都需要嘅能力。」

「唔好畀戰鬥既定嘅符號所規限,每日自肥,總會得到力量!要耐心靜候!」

「要戰勝荒謬,首先要接受荒謬嘅必然性。文明總會勝利,係信念!」

「相信一種價值,因為價值係由我哋主觀去定義。 只要你相信,佢永遠都會存在。」

「就算所有事都唔順利,都要記住自己能夠貢獻到嘅嘢,唔好否定你當初相信嘅價值。」

「每次懷疑嘅時候都問一次自己,點解會喺度,喺度又係做乜嘢。如果未搵到答案,咁就再試一次,唔好停止嘗試。」

「就算所有事都唔順利,都要記住自己能夠貢獻到嘅嘢,唔好否定你當初相信嘅價值。」

「ERROR 並唔係唯一戰鬥緊嘅人,只要一日仲留喺呢片土地上,每一個人都用自己嘅方式,喺自己嘅崗位戰鬥,一個人唔會成功,但如果每一個人都盡力嘅話,每一個人都盡力嘅話!」

如果對未來冇希望,其實好難生存落去。對前景感到迷惘嘅香港人,相信睇完呢集之後,會獲得一種難以形容嘅力量,好似知道返自己嘅崗位同埋方向,重新對未來抱有希望,哪怕只係一絲希望。

總結,有人鬧《ERROR 自肥企画》冇社會責任?正正係相反,因為節目建立緊香港人今時今日最需要嘅精神 — 無論環境點惡劣都唔好放棄,堅持信念,努力做好自己,耐心靜候。其實「自肥」唔係「自肥」,而係「自強」至啱。

分類:生活, 社會, 藝術

Tagged as: ,

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s