社會

老師份內事:與學生同行

教育工作者就算唔係最認識下一代嘅人,都起碼係父母以外,最接近下一代嘅人。我地知道年青人最需要嘅,並唔係老師教佢地應該點做,而係要知道我地願意並肩同行、靜靜相信,已經好足夠。

見到年輕人做咗D同大眾期望有出入嘅事,好多人會不留餘咁譴責、割蓆。又好難怪,因為大家都可能忘記咗,成長根本就唔係一個優雅平靜,或者為咗討好邊個嘅過程。

但身為老師,因為每日都會遇上成長嘅核突與尷尬,亦有無限嘅感動與憧憬,所以即使會失望、會憤怒、會傷心,都總會比一般人多一份諒解。老師呢份職業,係因為有學生而生,唔好調轉嚟講,所以,與學生同行,係我地份內事。

老師唔容易做,但能夠見證成長嘅威力,係呢份職業獨有嘅幸運。身教重於言教,所以好多老師會選擇相信,同埋身體力行守護下一代。

參加817教育界遊行時,各位老師收到一封信。

遊行起步前,雨大得好緊要,擔住把遮,頭頂依然俾雨滴濕曬,因為把遮係濕到透咗,頂部開始滲水。當然無人會怨,因為有把遮已經好好。

遊行結束前,行返落香港公園途中,有一位少年喺度鞠躬道歉,亦有一位同伴攞住一張手寫標語:「對唔住,呢兩個月令你地費心。」我拍拍鞠躬少年膊頭,叫佢記得休息,佢就好似一般學生咁答:「知道老師。」呢兩個月嚟佢地一直撐住,而家開始攰、開始受傷喇,我地不過喺冷氣房的費心算啲咩?

當雨勢大到癲嘅時候,區區一把遮點會頂得住?但係無人會因為佢開始滲水,傻到丟咗把遮寧願任雨淋,我地反而會緊緊捉實,一齊撐得幾耐得幾耐,因為總會有停雨嘅一日。

文:Ms Yu,八十後教師,相信一切源自教育。原文刊於作者博客立場新聞

文首圖:作者攝

分類:社會

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s