社會

破釜沉舟 辭職展決心 全力深耕社區/林兆彬

前日係我最後一日喺立法會返工,因為我已經辭去咗立法會議員助理一職--大學畢業後嘅第一份工。五年半議員助理生涯劃上句號,感激葉建源議員、議辦、教協上上下下所有同事們嘅教導。

辭職係為咗專心落區,但呢個決定並唔容易做,因為之後一段長嘅日子我都唔會有人工,但如果唔辭去正職,根本無法做好社區工作。過去一年半,好似返緊兩份工(其中一份冇人工),只能硬著頭皮撐下去。

不過由聽日開始,我將會成為一個比全職更全職、但冇人工嘅「民主農夫」,全心、全身、全力深耕社區,以謙卑嘅心服務街坊。為了追求理想,只好付出代價,燃燒過去五年半嘅積蓄,燃燒27歲嘅青春。 相比起仍在獄中、即將入獄嘅政治犯, 我嘅付出實在微不足道。

台灣美麗島事件受難者、前高雄市長陳菊曾經講過:「如果你的生命中有段時間可以實踐自己的理想,不用去考慮任何人的利害關係,只要盡情發揮,豈不是人生最幸福的事情?」

人生係由無數選擇積累而成。由細到大我一直住喺公屋, 對貧富懸殊問題有深刻感受,所以大學選擇咗去讀社工,希望幫助基層。入咗大學之後, 參與中大學生會、學聯,深深咁明白到政治、民主、民生係不可分割。喺2013年,我從中大社工系畢業之後,選擇咗去做立法會議員助理,喺呢五年半期間,我同大家一樣睇住香港嘅政局與立法會不斷沉淪。

雨傘運動、旺角騷亂、DQ立法會議員風波、人大釋法,特首選舉、高鐵割地兩檢、修改議事規則,立法會補選……

面對住不斷進化嘅威權統治者,我哋好似咩都改變唔到,呢種政治上嘅無力感好像滾雪球咁越滾越大,對民主運動嚟講係致命嘅。如果沒有新的方向、新的目標、新的論述,民主派支持者對政治理想嘅熱情將會冷卻、不再投票、不再參加社運, 而中間派亦都會向建制靠攏。

香港正在沉淪, 我時常問自己究竟仲可以做啲咩? 電影《悟空傳》其中有一句令人熱血沸騰的對白:「在你感到最無助最無力的時候,才是你真正覺醒的時候。」

點解我哋成日輸比政府、保皇黨?除咗因為大政治環境對民主派極之不利之外,我哋本身嘅實力都好差,特別係地區組織方面,跟保皇黨強弱懸殊。所以喺當下,我哋只能防守,為民主運動累積力量,喺各個陣地寸土必爭,為未來播下希望嘅種子。

大約兩年前,我喺度諗緊,未來嘅民主運動可以有以下三個短中期目標,以重燃大家嘅希望:

1)民主力量需要進一步在社區上紮根, 抵抗社區染紅

2)培育更多年輕人參政, 同中共鬥長命

3)民主派爭取「社區執政」,區議會議席過半, 獲取更多資源和權力,不再單純係「反對派」, 產生18個影子市長, 地方包圍中央

只要達成呢三個目標, 就可以大大增強民主派跟政府談判時嘅籌碼 , 不論喺民生定係政治議題上面。當土壤建立好之後,下一波民主運動就會隨時出現。

改變不會從天而降,要靠大家一起繼續努力,未來嘅路非常難行,拜託大家督促小弟喺地區上嘅工作,大家可以去我嘅office搵我吹水(太子大南街88號閣樓), 亦歡迎大家幫手做義工! 感激不盡!

#林兆彬 #旺角東 #社區前進

分類:社會

1 reply »

  1. 旨意你? 你知唔知你晌聞鼠黨班柒頭入面既內部評價係乜? 俾班咁既癈人笑你癈 你既癈就真係唔係一般既癈 旎住選舉就到博上位吖? 努力喇 到時聞鼠黨會搵件老坑黎攝你位架啦 放心啦

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s