社會

簡體字要識,但唔駛學 / 簡兆明

P1210157_r

雖然,有時我都會恥笑簡體字嘅造字章法九唔搭八,實則我對簡體字冇偏見,攞起本大陸書一樣照睇。我唔會笑簡體字係文盲用嘅,因為大陸好多知識分子、文學家以至諾貝爾文學獎得主,都係用簡體字寫作。劉曉波、張祖樺等人嘅零八憲章咁正義,都冇得唔用簡體字。中共為掃盲而草創簡體字,有佢嘅歷史因果,唔到我理咁多。但香港開埠以來都用繁體字廣東話,教育局突然開倒車,要全港學生學簡體字,用普通話辭彙,咁就係盲從。中共最新、最迫切嘅掃盲任務,應該係掃香港教育局。

教育局咁講:「學生在掌握繁體字後,亦應具備認讀簡化字的能力,以擴大學生的閱讀面,及加強與內地、海外各地的溝通。」

呢番好意,多謝夾盛惠。既然識得講要掌握繁體字先,唔該唔好搞咁多野,一切中文課程照舊用繁體字廣東話。要識簡體字,到時自然會識,唔駛強廹教學咁野蠻。

我自己嘅經驗就係咁。當年喺港大讀中文中史,有啲參考書係簡體字,成班同學都係要買本《简化字总表检字》,花費五毫子,不出一兩個月,睇大陸書全無難度,邊有話特登改用簡體字教學咁無聊?而家我亦有唔少「內地、海外各地」嘅朋友,溝通得唔知幾好。繁體字廣東話教學有乜野問題?

P1210124_r
就算教育局真係咁有善意,都唔駛勞師動眾。最簡單嘅方法,就係中小學生每人派本《简化字总表检字》,可以簡體查繁體、繁體查簡體,港生陸生,各識其唔識,慳水又慳力。

繁體字係漢語文化根本。當年我有修讀文字學、音韻學,《說文解字》、《宋本廣韻》、《粵音韻彙》等必用工具書唔駛講都係繁體字。你夾硬用簡體字教學,即係要文字學、音韻學失傳,根絕漢語文化。咁樣同伊斯蘭國炸毀千年古蹟有乜分別?有!你罪大惡極好多!

教育局「假好意」為學生將來,其實係特區政府「真陰謀」為中共統戰,不惜清洗香港本土文化,連中國千年文化都一齊滅絕。一旦文字統一,特區政府就會大條道理將全港官府中文招牌、信封信箋名片,以至交通標誌、戶外戶內公共標示,任何眼見得到嘅中文字都劃一簡體化。到時億億聲開支,你估邊個埋單?講唔定,就算唔立例管制,私營機構都會被迫自動自覺,乖乖跟大隊,一切從簡,你話幾勞民傷財。

咪話我唔早響:有心創業嘅朋友,公司中文名要改個冇簡體字嘅,揀地址都要揀個冇簡體字嘅街名大廈名,咪到時盞益咗招牌佬、印刷佬。

[後記:本來好抗拒口語化寫文,不過教育局咁唔中意,我又 OK 喎。]

8 replies »

  1. 好少人有留意, 三年零八個月日本仔都推過日本漢字同學日文. 有冇證據? 最明顯既就係改街名同日據政府文書. 呢個就係HARD SELL.睇吓戰後仲有冇人理佢去學日文? 當時恐怕係有史以來最少人去學日文既年代. 時間一轉, 去到七, 八十年代, 日本堅係經濟起飛, 由高級多少既日本小說, 動漫, 電視, 電影流行曲, 甚至去到鹹片咁極端. 因為堅好聽, 好睇, 又冇俾日本仔騎在人民頭上為你服務. 冇正式數字, 不過可能係另一個有史以來, 有史以來最多人學日文既年代. 喂, 去到打過仗死成幾千萬人咁極端噃. 係, 呢吓黎軟既. 就係咁簡單.

    有冇必要學過日文至可以聽日文歌? 冇. 電視電影呢? 冇. 日本貨呢? 冇. 日本人有冇要求你使用日貨時顧及日本人心理? 咪一樣大把大中華膠一路屌日本仔一路用樂聲牌電飯煲煮飯. 日本人係賣品質, 賣科技, 賣手工, 賣價平. 賣好用. 用番電飯煲做例, 就係得一粒掣咁大把, 亜婆都識用. 根本唔理你識唔識日文.

    痴那文既命運呢? 一樣道理架喳. 一日俾佢騎在人民頭上為你服務, 你痴那文點推都係吹, 因為冇優越之處. 冇必要放棄中文用痴那文. 覺得你下賤就唔會睬你, 呢樣就梗架啦. 咪以為痴那人唔知呢個道理. 所以先至猛吹廣東話點差點差. 挑! 不論語文結構, 文字, 歷史, 甚至變化, 就係強過你痴那文. 痴那文鳩寫幾千字, 廣東話一千幾百字就做到. 正正就結構強過你至做得到.

    人衰話臭貨假, 講完.

    按讚數

  2. 多謝夾盛惠。盛惠,應是「承惠」。
    唔駛強廹教學咁野蠻。唔駛的「駛」,應是「使」。
    港生陸生各識其識。各識其識,應是「各適其適」。

    支持用正體字,支持保衞嶺南粵語。惟要贏得人尊重,基本的文字須掌握好。

    按讚數

    • 係吖, 國民黨政府先推簡體字架. 亞水唔知咩. 舊聞當新聞. 但係國民黨政府並冇硬性規定完全取代正體噃. 因為明知不可能. 睇吓國民黨直傳控制咗幾十年既台灣用緊乜? 講乜鬼野新文學運動至係標準, 正正就係同白話文個棺材蓋收上最後一粒螺絲. 廣東話就係因為冇俾人標準化到, 家陣先至仲係活生生既語言. 先至可以隨時與時並進. 正如可炆煨果個白痴教授走去正音, 佢手上本書係宋朝讀音, 所以宋朝先至係正音, 可炆煨咪係佢個名個宋朝讀音囉. 咁元明清朝既人通通都係錯既? 宋朝之前既人又唔識字既. 有人同意過咁既邏輯咩? 日本仔標準化咗語文好耐喇, 咪就係一吓釘死咗日文既變化. 家陣咪唔夠字用囉, 乜鬼都要併音. 韓國都有呢個問題架. 全盤殘化標準係老共自已搞既. 唔通又叫國民黨負責咩. 咁聽國民黨話就唔會內戰喇.

      笑, 當然會笑啦, 呢兩個一卵雙生既垃圾黨夾埋禍國殃民成個世紀啦. 冇呢兩堆賤人, 社會照正常演化, 話唔定真係超英趕美咗喇. 佢地都未覺得醜, 幾時輪到我地吖.

      仲有, 樓上果個丁哥仔, 乜字應該係乜字, 你去同陳凱文慢慢研究啦. 前提係電腦出得到先得格. BIG5又好, UNICODE又好, 根本冇擺晒所有中文字, 亦唔可能淨係俾中文霸咁多位. 寫法冷門既常用字多的是, 電腦出唔到又或者一般人睇唔明亦係白做. 而且仲要顧及音轉同語氣, 我又唔打算寫果幾百字搞到撚幾粒鐘至出喎.

      按讚數

      • 前提係電腦出得到先得格……

        莫非我部電腦跟各位的電腦有所不同?止我的電腦打得出?
        若不講究正寫,那麼,大家都無須爭論正體簡化字啦,求其勉強明白對方所寫的意思便可。
        正體跟簡化字,好比閣下之口語跟語體,雅俗之別也。

        按讚數

        • 係吖, 正正就係電腦唔一樣, 我家陣用緊呢部機就係唔知做乜裝唔到香港字. 夾硬裝就係有啲字出空格, 有啲又出到. 如果唔係屌白痴仔果陣我就一早用門字部首果堆唔駛就黎就去啦. 據聞香港字有少部份同撞痴那文撞CODE. 如果部機裝機既時候唔係先裝香港字, 有可能有我呢種情況都唔出奇架, 真唔真係呢個原因, WINDOW既野, 神又佢, 鬼又佢, 你去問電腦專家啦.

          按讚數

發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s