生活

別開生面的Man vs Tram Run/園丁

Run

跑步,唔一定只限在練習、緩跑或正式的比賽,亦有好多「別開生面」的搞作,好似兩、三年前,英國和美國就hit過一輪的MTR Challenge,跑友與地鐵鬥快,揀兩個距離最短的地鐵站,跑友第一時間落車,衝上地面喪跑到下個站,然後再上同一班車。熱潮仲吹到世界各地,香港好似都有人挑戰過太子/旺角和中環/金鐘站。

MTR Challenge無乜香港特色,但有班跑友,上周日真真正正跑了一場有香港本土特色和風味的跑步搞作。因應有退休規劃師,不斷鼓吹話要取消電車,又揚言「行路都快過電車」,於是有四十幾名跑友決定玩鋪勁,上周日晨早去堅尼地城吉席街總站,同第一班去跑馬地的001電車競賽,名為「Man vs Tram Race/人對電車8.6公里跑」,努力證明阿媽係女人,用最低能的方法回應,去凸顯「行路快過搭電車」的說法係幾咁戇居,真係用心良苦!

據報道,這場「進擊的電車」最終只有4人獲勝,其餘跑友頂多跑到金鐘便追不到了。網媒謎米形容為「四十長跑高手火併電車 得四人跑贏」,好似少林四十高僧打木人巷咁,最後得4人打直出返來,真係幾有電影感。

呢次較量唔單止引起社會迴響,而且應該對跑友有啟示,因為的的確確有4個人跑得贏,而且男女都有,跑贏電車絕係訓練的目標。如果快腳搵唔到速度相若的跑友一齊操,不如同頭班電車跑,除了有好多路線,西行、東行、短途、長途任君選擇之外,仲可以叫埋女朋友/老婆跟車兼計時(如果佢都起到身),練跑變埋拍拖活動。

以後跑友除咗計「一般PB」外 ,仲會計埋「電車賽PB」,例如:

問:「你電車賽乜PB呀?」
答:「快過電車+X分鐘/-X分鐘啦,去到XXX被爬頭……」

肯肯定,日後會多咗一班跑友,晨早流流同電車跑,Tram Challenge成為香港跑友操練的必要環節,唯一缺點係唔方便要過海的朋友。

奉勸想跑Tram Challenge的朋友,晨早流流的車可能衝紅燈,唔好掛住追車唔記得睇路!

原文見《am730》,繞著世界跑專欄

分類:生活, 跑步

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s