政治

佔領後半年 屈到病/流行萬里

老流迷迷糊糊地忙了幾個月,期間有讀者私信問我何解咁耐唔寫文? 老老實實,抑鬱哦!

這段時間,老流假如寫山,一定有人鬧:「你繼續和某某某行山跑步啦,寫乜春文!」真係冤枉,查實我半年來只行過一次山仔,跑唔夠50K, 再加我向來同某某某都唔是好熟,唔敢高攀。其實佔領後點解唔行得山,唔跑得步?食飯拉屎得唔得?老老實實,對人唔對事窩,都係收口算了。

寫政治,理據派出來鬧:「喂,你呢挺離地膠,成日淨寫埋啲空洞,無理據既爛文,收嗲啦!」吓,幾時開始,任何博文都要以論文形式發佈,有主題,有案例,有分析,有結論,仲要有參考⋯讀者們平日仲睇唔夠啲垃圾官文?寫下心情講下古都得掛?

假如呢排谷氣,寫嘢激少少,一定又有愛國粉跳出來鬧:「老流你激化矛盾,搞分化,傷害同胞感情!」我頂,同胞近年財大氣粗,人強氣霸,自我感覺良好,我有乜本事傷害人地感情窩。

假如遇上好人好事,寫得感性和諧少少,又會有熱血青年話:「你條五毛,左膠,做乜粉飾太平,維乜春穩呀,死上大陸搵食啦!」哈哈,我又唔使同官員打交道,做乜要寫擦鞋嘢,強國就唔可以有好人好事嗎,警察就無好人嗎?

假如寫到中間著墨,自以為不偏不倚,倆邊不是人:「你條垃圾2打6,應該表態先,拿,你黃底定藍底,左膠定本土,離地定熱血⋯」喂大佬,可唔可以先唔垃圾分類呀?獨立思考,以事論事,唔結派得唔得呀?

「X,咁即係騎牆,趁機抽水,罪大惡極,天地不容!」咁都得?無稿費無銀用既窩,抽乜水?

「無錢都寫,一定有不可告人既陰謀,你人定鬼先?」

⋯⋯
⋯⋯
⋯⋯

一言概之,寫乜都有人鬧。

自我起少少底,老流16歲第一次投稿某大報,當時連登了幾篇文,後來被通知往北角收稿費。記得發錢個位姐姐仔一個懷疑眼神問我:「啲文你寫架可?」小小流自覺受辱,一下子停了筆十幾年;及後機緣巧合,幾次短暫在幾間大報代筆,乜風格文章都寫過。

「X,咁又點,唔代表你文唔爛⋯」

呢句真,十幾歲寫到幾十歲,世界都變了,越來越唔識寫嘢。

「X,你兜友寫啲垃圾,有鬼人睇咩,晒X氣!」

無錯,有人鬧起碼代表都有人睇,最怕靜嚶嚶,拍烏蠅。唔寫文,忙係其中一個理由,無人問津自己又無周圍刮地盤又係一個理由,最主要其實都係文爛。

廢話說夠,話說昨夜佔領半週年,屈結在心,睡不安寧,深夜網上留連,在朋友面書上再一次看到山界前輩李維安師傅寫的一帖4字真言,合共689句,中肯理性,老流再三翻閱,服甚,特此轉載。

IMG_0027

9.28黃昏,強權高壓欺凌手無寸鐵的弱小,大批市民看不過眼,紛紛趕往金鐘行動支持,更瞬間發展成持續了倆個多月的雨傘運動。

有一小撮人對此場運動,最愛講什麼外來勢力,幕後黑手精心策劃,老流覺得此等人若非長期被洗慣腦的愚民,又不是既得利益者,必然是別有用心想逃脫管治無能之責的權貴!

佔領犯法,相信任何人都知道,到底是誰令那麼多良民甘負被捕風險堅定地佔領?到底又是誰上場後徹底改變了香港政壇文化?是誰望北而拜,向西而治?

在此老流衷心向所有曾經挺身而出的人致敬,情與義,又豈止值千金?

留意鄭大俠這名曲的第二句歌詞吧!

最後作一個聲明,流行萬里在過去倆年,直至呢一分鐘,只曾用過一個筆名出文,正宗2打6一名,大家不必多想。

分類:政治, 佔領

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s