生活

絕對不能支持 找秃鷹鳴槍的渣馬/高達奔

big banner2編按:本文第一版本已隨《主場新聞》消失,修改一個新的版本,趁渣馬前夕再貼一次。

正如689都有忠實支持者,「渣馬」又豈會冇人撐?如果一個比賽,今時今日仍然搵秃鷹鳴槍,實在想不到有任何支持的理由。不過每次批評渣馬,總有人為田總百般護航,最意外連個別開明的跑者,都接受一個搵禿鷹主持開幕禮的渣馬,係主場博客群話「批評渣馬係冇野搵野黎講」,「文章係為寫而寫」,就可見渣馬的確有唔少死忠粉絲,願意放下找禿鷹鳴槍這一筆,不能不令人心傷。

其他流行的回應包括:
跑步就係參賽,造時間,其他野(包括乜人鳴槍)對跑手唔重要。
搞一個七萬幾人的比賽唔容易啦,仲批評啲乜,咁叻你咪黎搞囉?(如果真係有得搞,相信主場的兄弟們及香港其他賽會,肯定當仁不讓即刻接波。)
你班責難渣馬的跑手,只懂埋怨渣馬得生蕉:「世界好多馬拉松得水飲喳,連蕉都冇呀!你地只懂埋怨,不如撫心自問自己體能點解咁渣!有無用心操練呀 ?」

呢啲口吻,話批評渣馬雞蛋裡挑骨頭的,喺咪好熟口面呢?呢啲咪就黎王敏超的口吻,斥責呂品韜輸波賴地硬,黃金寶去勻全世界都冇隊醫啦,你就淨喺識諉過於人囉!

當民建聯都要做理性的建制派,是其是、非其非,絕不逢梁必撐,落得有辱無榮的境地,亦都希望政府有進步,但好多跑友似乎仍覺得唔需要對渣馬有乜要求,只要有比賽、有計時就收貨啦。個別死忠支持者,甚至死抱華國鋒對老毛的兩個凡事:凡是渣馬的決定和安排,我們都堅決擁護;凡是渣馬定立的規矩,我們都始終不渝地遵循。就算渣馬做得唔好,參加者都應該先檢討下自己係咪有問題,因為香港人一定要支持渣馬,參加者只可以善意建言,唔可以嚴詞狠批,咁樣等於狂抽渣馬水兼「唱衰自己的比賽」!

有乜讀者就有乜傳媒,有乜市民就有乜政府,有乜跑手就有乜比賽,想香港的馬拉松進步,唔再搵犯眾憎的官員鳴槍,公然與香港人為敵,一定有教育一班有要求、思想進步的跑手。

想知道自己思想有幾進步,麻煩各位跑友,花少少時間做一個心理測驗:

問題一:你覺得渣馬提供唔夠蕉,又或者得生蕉,係咪好有問題?

  1. 小題大做!跑步唔係為左食蕉。唔夠實力、唔夠操練的跑手,先會對一剝蕉都咁大反應。
  2. 只係大會行政和溝通有問題啫,唔駛去到咁極端,上綱上線呀?
  3. 無辦法,大會係咁,下年只好自己帶。
  4. 已經17年了!但連蕉的細節都做唔好,反映大會根本無能力辦大型活動,是時候撤換。

問題二:對於渣馬把大量補給當剩食捐出去,你有何感覺?

  1. 嗱,證明大會物資足夠啦,你地仲插佢慳錢唔買蕉,係對大會唔公道!渣馬做緊好事,你地應向渣馬道歉。
  2. 可能太多人甩底,大會又驚畀人鬧唔夠預多咗啫,送出去都係好事。
  3. 大會的行政和運送有問題,希望下年汲取經驗啦,送出去唔好嘥都係好事
  4. 說好的香蕉一條都冇,原來係囤積埋捐出去!搞左17年都終係咁!根本就喺誤導,等外界以為跑手食得好豐富,跑步好浪費食物,係陷跑手於不義!

問題三:你喺咪好支持渣馬?

  1. 香港人,梗係要支持自己的比賽啦,唔可以唱衰同批評!
  2. 都知道渣馬揸流灘,但未至於一無是處,都係香港一個盛事。
  3. 渣馬是是旦旦,但無辦法,香港得一個比賽,冇得唔參加。
  4. 田總渣打長期騎劫香港馬拉松,阻礙香港馬拉松的進歩,不會再參與。

問題四:對於田總的帳目不清,高威林被傳媒指利益衝突,你的看法是:

  1. 樹大招風,其他人眼紅渣馬成功,指控不值一晒,如果唔喺老廉一早拉人啦!你年年講煩唔煩啲呀?
  2. 田總和高生雖然麻麻地,但始終都係大型活動,都係為香港做好事。
  3. 麻木,香港體育界就係咁,唔鍾意只好唔跑囉。
  4. 憤怒,污辱了這項崇高的運動。

問題五:你對渣馬賽道的意見是:

  1. 全世界最好的賽道,波士頓都無得比,夠挑戰,風景好,西隧令人心曠神怡!
  2. 三隧三橋都係香港特色嘅,真正熱愛跑步的,喺唔應該彈賽道,彈咪唔好跑囉!
  3. 有些悶,空氣麻麻地,但跑咁多年都有感情了,希望年年都去跑。
  4. 傷肺、傷身更傷心;冷冰、零互動、感受唔到香港風情。好似台灣人講,應該正名做國道馬拉松(國道即高速公路)。

問題六:有人話鍾意渣馬禁止打氣,搞到無晒氣氛,你的意見是:

  1. 波士頓條賽道的打氣聲真係好x嘈,唔該佢哋收聲啦,柏林多野飲到你狂疴,渣馬最好啦,無人騷擾你做PB。
  2. 比賽唔一定要打氣,真正熱愛跑步的,係唔會介意呢啲嘢。
  3. 都係架,但香港係咁,就算你畀人打氣,查實香港人都未必來啦!
  4. 點解唔畀打氣呢?點解,點解???

問題七:跑馬拉松時,你會唔會食,市民沿途自發提供食物?

  1. 唔會,真正有實力的係唔需要,何況賽規唔畀食,而且我仲好驚中毒,唔知乜人畀乜嘢你食。
  2. 唔會,驚畀田總DQ。
  3. 唔會,驚PB唔到,慳返些少時間
  4. 會,並多謝市民的熱心支持,令賽事氣氛更好,令其他市民都可以參與。

問題八:你對渣馬輪椅賽的安排有何看法?

  1. 阻住地球轉,為幾個人封成條路唔值,搞多場10K好過。班人仲投訴就取消佢啦,唔搞就唔駛煩
  2. 大會規矩係咁,都認同輪椅有安全問題。投訴咁多做乜?練好些,下年咪唔會畀DQ囉。
  3. 大會唔係無心搞嘅,只係無乜經驗啫,可以向大會反映意見,下年進步啦。
  4. 好唔合理,大家都係平等的,點解一定要設時限淸佢地走,唔可以一齊跑?

問題九:你覺得渣馬應該幾點起步?

  1. 越早越好,跑完左仲可以食早餐返去訓覺,唔駛咁熱。
  2. 而家幾好,唔會太熱。
  3. 太早啦,但一年一次,算啦。
  4. 如果係照顧跑手,等大家最好狀態,點解唔改去較乾、較涼的十二月尾至二月初,到八、九點大家食個好早餐再起步?

問題十:你認為未有機會搵葉伯主持起步禮,係咪好可惜?

  1. 呢個問題小題大做,葉伯在生時都老啦,有無先問過佢老人家肯唔肯呀?你都戇居。
  2. 你抽夠葉伯水未呀?唔好為左反渣馬而搞佢,好唔好?
  3. 如果當年有搵都係好事,不過都算啦。
  4. 呢個係香港永遠的遺憾。

問題十一:你對搵秃鷹主持起步禮鳴槍,有無意見?

  1. 你叫佢秃鷹喺冒犯緊佢!支持警察執法,支持曾偉雄!
  2. 警察有份幫手封路,搵警務處長鳴槍都好正常。
  3. 雖然唔知佢同馬拉松有乜關係,但無乜大的強烈反對。
  4. 渣馬好揀唔揀,揀個不得人心的官員鳴槍,喺傷害市民同跑友的感情。

計分方法:

A:一分              B:兩分              C:三分              D:四分

11-16分

你係全宇宙最無敵的渣馬粉絲,也是無可救藥的跑膠,下年渣馬應該搵埋你去鳴槍。

17-32分

你係簡單的跑手,但亦都因為太簡單,所以對渣馬田總過分包容,有斯德哥爾摩症候群的病癥,間接助長田總是是旦旦,年年搵禿鷹鳴槍,求其hea過就算。你雖然好認真跑步,但對你黎講,馬拉松只係一個比賽,畀大家做時間而已,所以對比賽安排要求唔多,除左時間成績外,唔會對馬拉松有乜夢想。

33-40分

你係對比賽有少少要求的跑手,希望比賽做好啲,但亦覺得應該畀田總機會改進,樂於反映意見,唔會輕易罷跑渣馬,雖然渣馬唔愛你,但你仲未死心。

41-44分

你對田總渣打早已不存寄望,明白這不過是一場沒有結果的苦戀,只有換了另一個主辦機構、換了一個知道現代馬拉松運動是甚麼回事的特首,我們的理想先可以實現。

一齊噓爆秃鷹

最後呼籲各位全馬挑戰組和一組的跑友,起步一刻記住一齊噓爆秃鷹。有關呼籲請參考此FB 群組:召集渣馬跑手,噓爆秃鷹林鄭

分類:生活, 跑步

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s