佔領

後雨傘創傷症候群/高達奔

IMG_2105

雨傘運動就這様告一段落,真係既失落、又傷感。流咗咁多血,千萬人堅持兩個幾月,大家放下書本、放下工作,去佔領區守路障、頂住黑白兩道攻擊,捱胡椒、捱棍、捱摧淚武器換取的空間,最後都喺守唔住,而且乜都贏唔到。睇住689、秃鷹那副有能力的樣,得戚地恐嚇秋後算帳,唔掃興真係呃你。

咁多人一齊,投放咁多感情、時間、精神,贏到全世界的人一齊撐你,但都無辦法修成正果,睇住夏慤村畀吊雞車鑑粗cam走,果種痛楚真喺比死更難受。絕不可能一句「I’ll be back」、「It is just the beginning」又或「就算失望、不能絕望」,就可以開開心心返屋企,安慰自己投降輸一半。

投入過呢個運動的人,無論男女老友,或多或少都患上「後雨傘創傷症候群」,好似貌似堅強的朋友E,一睇返守旺角的片,勾起佢當日做人鍊頂住班愛字頭果刻,都忍唔住老淚縱橫……

綜合自己及朋友的情況,後雨傘創傷症候群的症狀包括(由輕微到嚴重):

LV 1:唔想再睇任何淸場的片段

LV 2.:質疑自己喺咪發咗場夢?

LV 3:好驚自己會唔記得,嘗試諗返自己呢七十幾日,每日做過乜?貢獻過啲乜?

LV 4:後悔自責,點解唔出更多力去撐,參與更多

LV 5:後悔自責自己得把口叫人上,但真係要撐的時候,自己又淆底唔敢上,淨係食鍵盤、食花生。

LV 6:後悔無去守旺角或參與佔領龍和道

LV 7:後悔無佔領返個普選女/勇武男,做女友/老婆/男友/老公

LV 8:愧疚928無食過催淚彈

LV 9:不斷上Youtube搵雨傘運動片段,特別喺有咁靚就拍得咁靚果啲,由朝睇到晩,一邊睇一邊喊

LV 10:不斷播「撐起雨傘」各個唔同版本,群星版、淸唱版、台灣版,直至識識將「撐起雨傘」的歌詞由尾背返轉頭

LV 11:愧疚自己無食過胡椒噴霧

LV 12:愧疚自己無食過警棍、亦無流過血

LV 13:喺街度見到鐵馬、水馬、膠馬…總之可以移動的東西,都會諗點様紮路障

LV 14:發下毒誓,直至真普選落實前,都唔會駕車經過夏慤道

LV 15:發下毒誓,直至真普選落實前,都唔會再步行夏慤道同政府總部

LV 16:發下毒誓,連彌敦道和Sogo外都唔會再行

LV 17:午夜凌晨,一個人走出馬路,企係夏愨道/彌敦道中間發呆

「後雨傘創傷症候群」係無得醫的,搵舊戰友開解亦只可以舒緩少少,只能靠時間沖淡一點傷痛,直至離開世界一刻。要醫,就只有落實我要真普選。

分類:佔領

1 reply »

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s