對金鐘的秩序反感，不是針對個別人士，也不是想講邊一邊的人更堪當「抗爭者」，每個人的readiness不同我完全理解，我想講嘅係，反感唔係天跌落嚟，而是被多次被拒絕的反彈。
好多今日喺旺角的佔領者，其實都由金鐘過嚟，共同經驗例如食咗枝煙畀人話、大聲傾偈畀人屌，到我眼見的超級環保回收，潛台詞係「你唔守我嘅規矩」，潛台詞係「我識得多過你，所以我有權去set規矩畀你哋遵守，而且係為大局好的」，對唔住，呢啲規則，我都無份參與訂立，這種自覺係精英的思維，令我好嘔。
最令我憤怒，係有次見到朋友又呼籲人撤旺角，原因係「旺角已經無學生喇」，對唔住，我接受唔到，點解只有純潔學生先有資格爭民主，點解夜晚佔領、日頭返工畀人當係地底泥，畀制度壓迫到就快癲嘅基層人士就無資格？
大家可以話MK人英雄主義、搞唔清楚邊個政黨、無社會地位，就算同佢哋傾偈，佢哋都個個自認係廢青：我學歷好低、我中學都畢唔到業、我雙失……但佢哋就係喺佔領運動中搵到一個位置，守住條路、屌爆差佬，去幫助同埋保護呢個運動的整體，但社會無加獎佢哋敢於犧牲呢啲好質素，反而成日覺得控制佢地唔到。
抗爭之餘掃地分垃圾（我估大家知呢個係個例子，唔係針對環保撚），在運動初期令國際社會稱道，大家心中暗喜，自覺香港人頭上有個光環，呢個我有同感亦理解，係唔明點解搞搞吓有人被讚到上咗頭，好樂意做小乖乖，平日喺屋企紙巾都唔掉一張，嚟到就瘋狂掃垃圾，呢啲咪__ __囉（ok，我會唔會整喊一片丹心掃地的同學們呢又？）。
唔好意思，抗爭唔係要操行攞A做個好孩子，你唔知自己做緊乜，唔知自己真正目標係乜，其實好孩子同尻衝的壞孩子一樣係打緊飛機。
旺角有幾個著名癲人，屌差人不停口；又有擺明係鬼的物資站，今日搶水，聽日就打交，佢哋全部都唔係學校入面「班長級」的人物，但佢哋一樣可以安然留在旺角，擔當隊友。呢度啲人唔會講乜嘢包容，總之你畀人打爆缸，我幫你洗傷口，扶你埋一邊坐，唔理你真癲定假傻。佢哋好似細個踢波分隊，手氣唔好差咗幾件無人要的垃圾回來，不過佢哋唔會因為你係垃圾，叫你企埋一邊做後備，總之有事發生齊齊上，有人受傷有事，明明個個窮撚食飯都要慳住，都on99我心昭日月學人籌錢畀你睇醫生。
呢篇嘢我知又會令好多金鐘人唔開針，都係嗰句，如果你覺得我針對緊閣下個人，你係誤會咗我意思。我想指出的是，所謂和諧如果係把和你唔同嘅人拒絕在外而建立的，我呢一刻就要撕破呢個伊甸園的假面具。撕裂就撕裂囉，咩事啫，大家都要承認自己內心那對看不起別人的眼睛，先會睇到大家原來都係無著衫、睇到自己嘅不足，以及睇見更多同路人。
【原文刊作者 Facebook，題目為編者所加】
分類：佔領
我通常星期日至四夜守金鐘，明白有時大家對秩序過於緊張，我曾經明明拿著垃袋幫忙執垃圾，但卻被一位妹妹罵，叫我別亂丟垃圾。但我也曾經啞忍附近物資站的人高談闊論未能入睡，第二日返工遊魂。我的看法是，這只是部分人對保護運動的過分執著，太害怕把雞蛋捏碎了。
讚讚