有今生　無來世的暗角馬拉松（下）／園丁

上文「有今生　無來世的暗角馬拉松（上）」談及暗角馬拉松（Occupy Marathon）的構思與籌備。這一篇，簡單講講當日的情況：

比賽前一天，基本上要預備的東西都齊了，惟一是提醒各位跑友，千祈唔好記錯時間，搞錯咗係周六晚與周日早上之間的凌晨！慢慢跑馬拉松應該唔會有意外，但博友跑友Edkin都提點，要安排醫療急救，幸好有一個參加者是醫生，咁遇到有人意外受傷就唔擔心了。

這次暗角馬有一個日本人、一個白人參加，算是成功勾結外國勢力，但最可惜是105KM Umbrella Ultra Marathon的策劃人Richard Scotford因誤會，以為暗角馬是周六晚與周日早晨之間，結果錯失了參與機會。

一眾搞手及義工，早於11pm前已抵達暗角，預備Set起點、水站。當晚的人不多，只有兩三個警察附近，我們很快已經set好場地。

預備了一箱熟蕉，再加Power Gel作食物。

給完賽者的獎牌。網上認識了一位製皮黃絲帶的朋友Noel，每條義賣20元捐給學聯或學民思潮。我們把泥黃色的皮絲帶穿在膠獎牌上，等啲紀念品有啲皮的成份，唔好太膠。

由於只有三個人跑過條賽道，賽前已再三叫大家再讀讀地圖，因為我們不能安排足夠的義工，在所有轉彎位做Marshall指示。只能擺三個壯丁（Daniel, Ernest, Desmond）在三個最可能搞錯的位置，包括

四位女士(Veron, Daphne, Jac, Sarah)則留在起點，幫忙睇水站、守行李區、幫忙頒獎牌及其他支援。

給完賽跑手的紀念品。三個距離，用三種不同的灰階，純黑色當然係全馬。塊膠牌喺反光料，好似車牌咁，夜晚照燈喺會反光架！義工和攝影師亦有相同款式的紀念品。

跑手12am開始登記。暗角馬也是一個跑圈賽，繞著每圈3.3km跑。十公里要跑三圈；半馬要跑六圈多少少；全馬要跑十二圈再加多少少少。

為咗幫大家統計，自己究竟跑咗幾多個圈，每跑完一圈就攞一條橡筋。呢招，都係跑泰國的比賽學返黎，佢地無係折返點放計時毯，改為派橡筋以防跑手走捷徑。

一盒橡筋夠我用成世，但原來喺唔夠40個跑手數圈，唔少全馬跑手最後幾個圈都無橡筋囉，失策……

12am後，跑手陸續到達，把杯放在補給桌上，並作賽前最後補充。我們不提供膠杯，呼籲跑手自備，以減少製造垃圾。

12:30am左右，暗角的主角曾健超抵達了。有些傳媒似乎收到料，知道有個Occupy Marathon，亦來到起點做採訪。曾健超說：當晚感到恐懼和害怕，但之後的每一日，感受到的是市民的支持、手牽手、肩並肩與他加油，令他很感動。他希望大家亦關注其他被警方暴力所傷的示威者。

我們原定於1:01am出發，但因為漏招，以為所有人都知道暗角係邊，實情係好多人都未去過暗角，所以陸續收到跑手電話，話自己嚟緊等埋！咁不如遲多10分鐘時間起步，砌到六條一！1/11，1:11am出發。像徵一人一票，一個真普選。

起點分兩批出發，所以全馬的朋友先行，然後半馬與十公里一同出發，賽前叫大家認住識路的兩條友，第一圈跟住佢地跑。

由曾健超倒數十聲，兩批跑手跟住出發！

Occupy Marathon呢條Route，難度無五星都有四星。渣馬都喺三隧三橋，但OM一個3.33km的圈已經有三橋（中區行人天橋、夏慤行車天橋、立法會上添馬公園行人路橋），一個全馬等於3 x 12 = 36條橋。日本有葛飾北齋的富嶽36景，香港都有夏慤小村的暗角36橋。

GPS的Elevation Chart話，OM一圈要上90米。咦？咁跑一個十二圈的全馬，咪不多等於上杜拜塔？唔會卦！

但就算無杜拜塔咁高，2/3座IFC都走唔甩。

開跑前先發現，唔記得特別提提跑友，小心樓梯PK、小心大會堂前的紅綠燈、小心夏慤橋水泥地上種的植物和盆栽！算啦，即興山寨比賽就喺咁，去到先發現甩漏。

第一條就係要行樓梯，中區行人天橋：

怡和大廈落天橋後，經大會堂、紅綠燈位、經解放區的路障、香港會及和記大廈半公里平路，又要上第二條橋：夏慤行車天橋。

呢條橋應該至少三層樓高。

可能因為當晚是Halloween，好多同學都未瞓覺；亦可能好多後生仔睇到即時新聞，知道有個跑步正在舉行，同學仔落力為我地打氣！我地又同佢地打氣，大家一齊加油。

真係無諗過，一個凌晨的夜跑竟然有觀眾、有打氣！！！全世界都搵唔到咁好氣氛的凌晨跑，惟獨夏慤村有！

3:30am後，十公里和半馬的2/3人已完成賽事了。曾健超亦在終點留了好一段時間，替十公里和半馬完賽參加者，頒授獎牌和完賽紀念牌。

大部分示威者亦睡覺了。未瞓的，只有在路障守夜的義士，以及吹通宵水的年青人，他們看著剩下的全馬參加者一圈又一圈地，由天黑跑至天亮。我的最大發現係：跑遍整個夏慤村，原來只有一個帳幕傳出鼻鼾聲，證明香港後生仔的呼吸道都幾健康。

最難捱是第六個圈至第十個圈，相信很多跑手上夏慤橋、上中區行人天橋時，內心肯定不斷咒罵：「XYZ，邊X個設計埋啲咁X難的路線？」正因為條賽道唔易應付，大家都盡量慢慢跑，亦畀機會大家邊跑邊講野，互相認識之餘，又可以交流彼此對這次遮打運動的看法。

對於第一次在夏慤村過通宵的跑友，這次from mid-night to sunrise的守夜長跑，更是難忘的體驗。我們只是捱一晚跑12個圈而已，但他們卻是由九月底留守至十一月初。我好肯定，連續在馬路上紮營一個多月、在堅硬的石屎路上睡覺，比跑一次馬拉松困難得多了。

大部分全馬跑手，都是天亮後才到終點。由凌晨跑至天亮，看著天由黑、紫、深藍、藍、再看到太陽出來，第一批學生亦睡醒爬出帳幕了，還可以跟他們說聲早晨。曾健超也沒有睡覺，再次回到已光明的暗角，替我們把獎牌頒給最後幾個全馬的完成者。

早上七時左右，我們把暗角的東西清理好，剩下的幾十升水、Sport Drink和香蕉，全部留給立法會、及政府總部附近的物資站，並把暗角馬拉松的簡單宣傳海報和地圖貼在暗角上，算是為這次比賽留一點痕跡。

暗角馬拉松有今生、無來世。這次的冠軍，也將會是永遠的冠軍。

PS: 暗角馬拉松結束後，我們開了一個FB Page, Running for Freedom & Democracy，若日後再舉辦類似為某訴求或議題的Charity Run，將會在該Page內公佈。