政治

【佔領】一直佔到2047 駛乜要下台階?/高達奔

IMG_1273

下一步、退場、撤、點收科、下台階,呢組詞語幾乎成為主流傳媒做新聞的惟一角度。某啲傳媒繼續老屈佔中三子遺棄學生,好似唔喺知道三子的佔中,早已喺催淚彈果晚宣佈結束咗,佢哋而家只喺個人身分,義助班後生仔而已!解鈴還需繫鈴人,解決政治問題的責任,一定落在擁有公權力管治的政府身上,可惜好多人仲喺搞唔清楚,其實全香港只得一個人可以令佔領運動結束,果個人就喺689,示威者喺根本無權力解決香港的政治問題。

說佔領運動要爭取香港人民心,未至於sometimes naive,但一定喺too simple。因為爭取民主、平權永遠喺靠關鍵小數的努力,而唔喺去感化沉默抽離無興趣關心的大眾。埃及有八千萬人,推翻穆巴拉克要幾多人?只需要三十萬人喺首都開羅的Tahrir Square,堅持日日集會十幾廿日,影響全世界輿論同美國,咁就推翻咗穆巴拉克政府,呢三十萬人佔埃及人口唔到1%!

1%已足夠推冧政府,唔駛佔佔下仲問其餘七千七百萬人,喺咪應該要退場,用「正常合法」方式去爭取埃及民主化?

今個月咁啱喺柏林圍牆冧檔25周年。當年東德人口有一千六百萬,喺萊比錫遊行的最多只喺30萬人,成個國家出嚟抗爭,最多都喺一百萬啫,都唔夠一成人口。咁喺咪因為仲有過千萬人唔出聲,傳媒日日抹黑你,你果一百萬人就唔好日日示威抗爭,唔好衝擊柏林圍牆,唔好癱瘓政府運作呢?

吾愛民意、但唔更愛公義,擇善也往往只能固執,佔領一日未竟全功,又豈能因多數人反佔領而退場?呢七成人,即使你宣佈今日退縮返去添馬公園集會,亦唔會因為咁而變咗多謝你、感激你、支持你的。如果咁樣都有效,你試下當年同爭取平權的黑人講:「我地要睇諒白人的處境呀,唔好佔太多白人專用的巴士座位,始終白人係社會大多數,我地要慢慢教育佢地,冇佢地的支持喺唔得架!」你又不如試下同啲國泰機師講:「罷工還罷工,千祈唔好聖誕新年假期罷工呀,唔好搞到我去旅行呀,要爭取民意支持呀!」打工仔唔趁旺季罷工,去逼資方妥協談判,唔通等冇野做時先罷工?果啲唔叫罷工,果啲喺叫收工。

唔通你班生活只為追求搵食、只追求方便的廣大市民,會因為「體諒」機師放棄擾民而感激涕零?唔通市民會畀你「顧全大局」的高尚情操而感動,一齊轉過來幫你爭取?你唔好玩啦!

反對佔領的香港人,極少數是利益受損害的階層;有一些反對者是票投給溫和民主派的人,唔介意一直等七一遊行的距離長過上月球;大部分反對者則視佔領運動只喺爭取私利,因為佢地根本不在乎有一張票。對於反對的人,無論你持甚麼理由反對,客觀效果都等於站喺高牆的一邊,甚至喺幫手撐住高牆,等689繼續振振有詞唔退讓,聯同689一同阻住下一代、下下一代,討回我地應得的選票,討回我地喺香港應有的話語權。

為咗呢班人而退場,只喺搞假和諧,真騙局,啪麻醉當醫病的政治安慰劑。香港過去十幾年的政治比做戲更假,正正因為香港人喪啪咗太多呢啲政治安慰劑,而唔喺真真正正去解決深層次矛盾,食到斯德哥爾摩症候群上腦,同情高薪厚祿的高官、OT都收半億的警察、同動輒投訴的自私港人,認為示威反對一定要跟足本十幾廿年的戇膠劇本:泛民扮爭取,政府依舊企硬,投完反對票、搞個反對遊行、同警方傾掂數、試旦搵到條友接信、然後終點解散返屋企、搞吓減肥式的絕食、然後議會照舊否決、政府建制泛民收工就做下一單、市民繼續吃喝玩樂,呢種戲已經冇人想再睇落去。

難得今次佔領運動,喺真真正正將所有問題攤晒出嚟,用堵路包圍政府的方式,令政府和全體市民都要正視呢個問題,逼政府解決不民主制度下衍生的各種不公義。就算畀你成功武力清場成功,只喺將問題又掃返晒落床下底,根本唔喺解決問題的方法。何況催淚彈已經令好多香港人的基因突變,旺角、龍和道多場戰役,令新一代短時間內吸收咗好多實戰經驗,日後隨時復活真喺冇難度。

對我嚟講,928後先係撥亂反正,而家的香港先喺堅正常。香港駛鬼要咁X多馬路、要咁X多車?珍貴的土地攞晒去起馬路,究竟係服務車主、服務駕車的半山商賈高官、定係服務人民?夏慤村的淨土,每天畀大家散步、交流、講學、野餐、跑步、藝術創作、一起經營小社區,呢啲先係正常。至於今次運動點樣改變對城市空間的理解,可以參考何雪瑩呢篇文:佔領區的空間政治

你想通車,唔該先幫手解決政治問題。你唔想通車,大家咪只好一直佔。問學生撤唔撤,根本喺「本來無一物、何處惹塵埃」的偽命題,問嚟真喺嘥X氣。撤?撤乜X!佔到2047,佔到有真普選為止,駛乜要自己找下台階?講完。

murakami

 

PS:連村上春樹都開口都撐,呢刻仲有乜理由撤?

分類:政治, 佔領

2 replies »

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s