其它(請作者分類)

【團結撐小店】系列 - 獅子山下的心燒時分 / 啡白

DSCN6187

一首歌、一套電視劇系列為獅子山「開光」,從此每個香港人心中都有一座獅子山。三十多年後,一幅黃色直幡貼在獅子頭上,迷惘的獅子靈氣再現。

心燒食堂近期推出一款特飲Lion on the Rock,一把雨傘插在黃色冰沙上,杯外貼上「我要真普選」的小直幡。有酒精或無酒精,有得揀。 負責人Aska,上星期看到一包常見於酒樓啫喱糖上的「遮仔」,靈機一觸,用一杯飲品去呼應山上已消失的直幡,「我覺得香港人對香港人好咗,關心香港多咗。好多人都會一啲『橋』,去廣泛宣傳呢個運動。」Aska是個頭腦靈活的人,之前做過記者和廣告設計公司老闆,2年前跟拍檔開了「心燒食堂」,他形容創路上有運氣,唯一一件事情令他最苦惱,「請人真係好煩,有時出一個唔錯嘅價錢,做咗無耐都會走咗。不過我明白,而家好多人都有大學學位,都想搵一份Office工。仲要好多個一讀完都要還債,緊係想人工再高啲。」跟初出茅廬的人相處多了,自己都會想有幾多年青人真正做到自己喜歡的工作,是不是每個都喜歡做金融做地產做會計,「我覺得父母都係一個重要因素,細細個時啲父母交足錢俾佢哋學畫畫學樂器,到佢哋大個想讀音樂讀藝術就反對。其實係剝奪咗佢哋發揮所長嘅機會喎。」他覺得人性化的工作,在科技時代下更顯珍貴,「我前排睇咗一個日本節目,講兩個鐵匠同佢哋屋企人,參加一個比賽。每家要做一個最圓最滑嘅鐵球,放喺一條一百米路軌上,鬥碌得遠。我最感動嘅地方係,鐵匠係一份好多人唔係咁睇得起嘅工作。但職業真係無分貴賤,你用心做嘅話,其實真係行行出狀元㗎喎。」

他想很多關於下一代的路向問題,因為他有一個三歲的女兒,未來的社會也終會交到女兒的手上,「所以我成日提自己,個囡鍾意發揮乜嘢長處,要盡量幫佢去發展。」近日他也經常參與佔領區中的集會活動,幫忙搬水搬物資,他是為女兒、為下一代走這一步,「我出發點係支持同保護學生,難得佢哋咁熱血。當然好多人會話佢哋啲想法太過天馬行空不切實際,但諗深一層,未來嘅世界係屬於佢哋,佢哋係應該有份去諗未來嘅香港係應該點走。」從數據上看,香港的經濟不錯,但他認為現今政府的問題越來越明顯,「我覺得佢係退步緊。唔講其他,淨係講貪污,無啦啦要送咁貴嘅茅台俾人。廉潔真係一個健康社會最基本嘅嘢,呢條底線都守唔住,惡化落去嘅話下一代點算?」

政府對今次事件的處理方法,也顯示了這個政府的質素,「有好多人都話覺得呢個佔領運動係違法。唔好講之前諮詢期佢哋有冇真正聽人講,淨係罷課頭幾日,啲學生叫梁振英出嚟集會現場同學生會面。佢有冇出過嚟先?所有嘢之前都係試咗好耐合法咁做㗎喎,你唔肯聽唔肯做,先至搞到咁咋喎。有時啲朋友或者同行怪學生時,我都咁樣講。」政府無誠意解決問題之餘,他察覺出政府令市面情況更混亂,「淨係講開返軒尼詩道通返車,可以塞過佔領之前,條波斯富街塞到痴線!仲要無啦啦有咁多吉嘅巴士,啲的士司機都知有人搞鬼啦。」

面對如此的政府,他在這次運動之中,難得地再次感受到香港人的齊心。儘管訴求不同,大家也是追求一條更公平更闊的大道,「喺金鐘見到既人,簡直係近年最有禮嘅一班。可能近年多自由行,條街啲人密密麻麻,大家都好燥,香港人對香港人都燥啲。但大家有一個共同目標嘅時候就好齊心,可能大家都醒覺了,唔會淨係掛住搵錢同玩電話,係會諗對方嘅未來。講真,唔係人人都有條件去移民㗎。」

此時此刻,我哋大家在獅子山下再次相遇上。

心燒食堂
銅鑼灣駱克道487號駱克駅22-23樓
23838686
https://www.facebook.com/SumSiuBarNGrill

【團結撐小店】系列

趁這非常時期,介紹旺角以及銅鑼灣的小店,志在連結同為香港用心付出的人。

不撕裂,要團結。

如有以上地區的小店店主有興趣接受訪問,或你有小店想跟我推介,請到www.facebook.com/brownwhitehk,然後私訊給我。謝謝﹗

1 reply »

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s