財經

【佔領】推介七隻佔中概念股/高達奔

invest

遮打運動已演變成政治十號風球,但689忽然恐怖份子上身,學拉登匿埋不斷發放電視講話、利用人道車輛運送大殺傷力武器,寧願攞市民生計做消耗戰的人盾,都唔肯順應民意下台問責,甚至連落廣場探學生的門面野都懶得做,亦唔重新安排交通同公務員上下班時間,由得呢個政治十號波一直高掛,任由人民自相殘殺內鬥,實在可恥至極。

鬧佔中阻人發達、阻人搵食的學棍,點會唔乘機作大佔中的影響?就鬍鬚曾都唔敢講到對經濟影響啦,呢啲似跳政治忠字舞,認真你就輸。何況無論小商戶,定喺大財團,做生意從來都唔喺穩賺不賠,有風險喺一定的,你與其怨佔中阻你發達,不如諗下點變通,減低政治十號風球的影響好過。話唔定到下次續租時,佔旺變咗爭取減租的籌碼,到時你就會多謝呢班唱生日歌的示威者。

返回今日的正題,雖然政治十號風球高掛,但都唔代表無贏家,好似星球日報咁,A叠就狂砌佔中搞屎棍,體育版就打擦邊球撐佔中,財經版的「智豬在握」專欄,仲大義稟然地力撐,題為「揮軍入市迎佔中」的專欄,仲形容:

鎮壓令人痛心疾首,某人應該要問責謝罪…不過佔中亦喺幾年一遇的入市良機…唔懂把握就會「走雞」…冧就加碼掃貨,甚至瞓身借盡稅貸掃。(內容撮要)

星球叫大家入市的決心,比熱血人士堅守旺角的決心仲堅定,仲識得將亂局責任歸咎於689,而唔喺鬧學生阻街。星球財經版先喺香港人精神,化危為機,迎難以上!

咁有乜股票要掃?經過呢幾日的觀察,高達奔推介以下呢七隻有佔中概念的股票:

一. 麥當勞

喺佔中的日子,金鐘海富麥當勞全香港最旺,據聞日日連渣都賣晒。風雨不改賣包的老麥,已成為遮打運動最穩定的糧倉,亦係最堅定支持學運的商號。強烈建議老麥一姐黎韋詩,親自到現場派飽畀學生,宣示老麥永遠站在雞蛋的一邊,洗脫福喜事件的陰影。

可惜,老麥冇喺香港上市,只喺紐約同東京上市。

老麥NYSE編號為MCD 。寫稿呢刻,老麥報價喺$94美金。

二. 港鐵(66)

巴士改道取消,最大贏家當然喺港鐡。港鐵都好配合佔中,呢幾日完全零意外!

港鐵周一收市報$31。

三. 金山工業(40)

學生成功堅守佔領區多日,最大功臣喺日夜相伴的Smart Phone,但如果無尿袋,Smart Phone又點可能同你捱通頂?金鐘千千萬萬的尿袋,足夠掟爆689。

金山工業周一收市報72仙。

四. 六福(590)

P1370710

搞佔旺先知旺角咁忍多金鋪。當彌敦道的周大福、周生生、謝瑞麟全部關門,黃金周的生意咪去晒六福度囉!有圖有真相(拍攝於上周一),六福都唔知幾旺。再加上競爭對手周大福的商譽,因為short上腦的女高層而一鋪清袋,六福長線都有得睇下。

六福周一收市報$22.3
五. 國際家居零售(1373)

呢間公司即喺日本城。據業內人士估計,日本城已有條件將賣膠雨褸、遮同垃圾袋的業務,另外分拆上市。

國際家居零售周一收市報$2.62

六. 和黃(13)

佔中概念股又點少得李生?同學仔飲用的屈臣氏水、戴的口罩、用的醫療品、同埋上網的data,都喺由和黃旗下的屈臣氏、和記電訊同百佳供應。

和黃周一收市報$98.55

七. 太古A(19)

在佔中的日子,太古廣場依舊車水馬龍,估計應該吸咗唔少銅鑼灣和中環名店客。推介太A而唔推太古地產,因為同學仔仲飲咗好多飛雪礦泉水。

太古A周一收市報$99.85

 

最後利益申報,本文主要喺畀大家輕鬆娛樂下,高達奔並不是證監會持牌人士,亦無擁有以上所有股票。

分類:財經, 佔領

2 replies »

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s