社會

有畫,真係唔要?/KIT MAN@社漫

有畫,真係唔要?
公仔佬自發 無得揀普選畫出腸


9月27號,正午12點至6點,一班漫畫佬會喺西洋菜南街開檔畫免費人像畫;時機己經成熟,目標非常清晰,把握機會,畫個貓樣,一齊傾,一齊畫!


【因乜畫公仔?】

香港咁嘅時勢,大難當前,匹夫有責。唔駛用劍嘅,用我哋枝畫筆就得。既然政府神鬼不分,我哋一班公仔佬就坐定定,和平理性非暴力免費同各位市民畫返張靚靚人像,不過呢,最終用橡皮圖章揼正你塊面,立即變CY,得咗!莫講話你自己,真係連阿媽都唔認得你。家陣中國特色一人一票就係咁款喇:以為有得揀?原來焗住食爛橙!

眾生面相各有態度,即使畫風不同、手法各異,都應該追尋你天真的臉。正如普選,你想揀三尖八角,定係蛇齋餅粽,都應該人人有say,殊不知政改無商無量,一個轉身屈晒全香港人只可以揀北京揀咗嘅人,一人一票搵笨賊,咁嘅票,你都要?

【袋住乜嘢先?】
第一屆選特首,年過四十歲,香港永久居民,住滿二十年,你肯拎表格,填妥交表,就成為參選人。入咗閘,獲得推選委員會400人中的八分一票提名,即50票,就可以成為正式候選人。當年8人入閘,4人候選,好pure 好 true。

家陣呢? 政改建議要响暫定1200人嘅提名委員會拎到過半提名,即601票,先有得成為正式候選人。大話怕計數,咁難先可以出選,擺到明退步,多數(香港人)焗住服從少數(選委會),咁嘅屎橋方案你敢袋住先?提名委員會嗰啲咩人嚟㗎?你有無份先?

【政改講呢啲?】
呢啲嘢關我咩事?你以為啦,到時加價加租壞港鐵一街屎尿23條,都係呢個「一人一票」特首一意孤行攪出嚟,一句「我係香港人一人一票選出嚟㗎!」仲唔即刻收晒你皮?政改袋住先,自己攞嚟賤。諗真啲,多幾個選擇,容易入閘先叫有得揀㗎喎老友,家陣叫你「袋住先」嘅嘢,有無得你揀先?

【唔想咁樣,可以點樣?】
正所謂原地踏步,都好過大陸製造(食獅x嘜梗好過地溝油啦),停一停,諗一諗,睇下各路有識之士點講:

區家麟:善良香港人

區家麟:政改無商量,歷史在發笑

程翔:京港關係危矣!「兩制」實質亡矣!

AfaAnnfaDOLLYGeeiokitMan@社漫ANGRYANGRYChuTungHokLANCEPangBearRONIUN CLE尊子小花張萬有溫水許許許謝曬皮阿塗阿平

※ 關於公仔佬 ※
漫畫家,俗稱公仔佬,是各行各業中卑微卻仍堅持自力更生的一群,就如很多香港人。今次「有畫,真係唔要?公仔佬無得揀 普選畫出腸行動」完全是無字頭村民自發,各路畫師真心膠出我的心,都係想略盡綿力,等各位香港人今日睇真啲。

參與是次行動的公仔佬、公仔女包括(排名不分前後左右上下忠奸):尊子/KIT MAN@社漫 /LANCE YAN /林兆彬 /ANGRYANGRY /阿塗 /多利繪 /GEEIO /Roni Wong /朱潼鶴 / 梁阿平 /UN CLE /白水@溫水劇場/許許許@香城怪異錄 /FLORA YU /張萬有 /方蘇 /謝曬皮 /彭啤 /熊膠 /AFA ANNFA/ 飯尾太郎/ CINDA YUE/ FLYINGPIG WONG

社漫》面書同步發放活動相關消息

特別鳴謝么心么肺文案創作人拔筆相助:讀女心經

分類:社會, 政治

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google+ photo

您的留言將使用 Google+ 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s