財經

黑白天鵝兩手抓/張士佳

Andreas Sigurdsson / flickr

Andreas Sigurdsson / flickr

近日港股表現都幾出人意表︰首先,在一遍看好情緒下調整,跟着仲跌極唔夠,自問只能猜中前者,後者跌幅係超預期。有追開本欄都應該知道我唔係咁睇好,叫大家反彈勿博,不要做羊,所以上星期內地用SLF變相放水,曾大升300點,我都堅信唔得,當年減存款準備金率,一次半次都無用,係要好多次,畀人印象排山倒海一系列咁減,大家才會心動。但現在一次性,等同宣佈唔會減存款準備金率,可以講這種放水,是杯水車薪,不足以盡釋市場憂慮,而大市既然能夠跌穿9月3日大升日的底,就唔可以一招起死回生,所以我情願等反彈高點才出手造淡,勝算及值博率會較高。

今日入市有條件睇中線

方向看中,但千算萬算都無算過,放水只能令港股彈半日,翌日已穿底下跌,期指更曾單日再跌300點,最低見24072,更諷刺既係美股正創新高,A股亦已守住底,唯獨港港斯人獨憔悴,連做十支陰燭。
上周五,大市無升跌時,我在電台節目中提出不妨開call博一博,何出此言?皆因歷史上期指陰燭最多連續11支,當時已經十支,而上周五期指以升147點開出,即係只要做陽燭就有147點或以上的進賬,而當時蘇格蘭公投結果未出,但大家心中有數,唔會獨立,所以當日應唔會大散,後來公投結果一出,大市果真反彈,即市已有200點利潤可食,就算到收市,回落唔少,又造一支8點的陰燭,都有130多點的利潤,即市計都非常唔錯。
即市獲利了結,鳴金收兵?非也,已經係第11支陰燭,而執筆之時港股場外ADR又跌到飛起,今天(周一)又可以認購期權照辦煮碗,再來一個即市行動,即市利潤當然較細,但這次短線是有條件變中線的,未行動前必先拆局,究竟點解全世界升,得香港跌,有朋友話關蘇格蘭事,斷估歐洲股市尤其是倫敦股市受影響最多,但倫敦股市都無港股跌咁多,又有人估計新華富時換指數成份股,但連出11日陰燭喎,加上流入流出,數量差不多,唔應該太關事,甚至有人話關iPhone6未能在內地首發,既然他日一定准賣,延遲咗啫,唔應該跌咁多,所有估計都莫衷一是。士佳大膽斷估係同佔中有關,若然中環大堵塞令滬港通實施有困難,延遲直至佔中結束行動,你估港股會跌幾多,我就唔敢估,這隻當然係黑天鵝,但唔代表無可能。
基於此,目前連跌11支陰燭,屬大升大跌之秋,係開期權長倉嘅時候,咁call put齊開嗎?我個人覺得已11連陰,除了開市見升博少少即日call外,若升穿上周五頂可先買平價期權博反彈,再買兩倍數量超超低價唔值錢嘅認沽期權博黑天鵝,因為黑天鵝烏鴉口一中,跌2,000點閒閒地,乜都返嚟。
相反,正路發展,反彈到25000水平,call則賺晒,put反正唔值錢,賺多蝕少計落都一樣和味。

【原文刊於蘋果日報

分類:財經

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s